Os ollos de Isaac, coma os de Picasso, vían alén do horizonte artístico. Díxeno hai anos e repítoo agora: en Isaac había moito máis ca unha chispa de xenialidade, e demostrouno como pintor, deseñador, ceramista e arquitecto. Pero ademais da admiración que sentín polo artista, abraioume o Isaac, pequeno-enorme home, fiel á memoria dos que, fronte á barbarie, deron a vida por Galicia; o que puxo en marcha empresas exemplares; o que se deu xenerosamente aos amigos… Eu, que fun un deles, tentei apreixar un chisco da súa personalidade en retratos e caricaturas, que irei dando a coñecer nesta páxina, como recordo dun ser humano inesquecible.
