¿Imos aló? Curso de iniciación al idioma galego

Imos aló? é o título do único curso de iniciación ao idioma galego que se emitiu na TVG. Ten dúas partes e fixémolas en Vídeo Voz TV, nos anos 1986 e 1987, despois de gañar o concurso convocado pola TVG.

O equipo encargado de realizalo estaba formado por Xesús Vecino e Chelo Loureiro, realizador e axudante de realización, respectivamente; Manuel Barallobre, operador VTR; Xoán Carlos R. Arroyo, operador de cámara; J. Luis Defez Shmidt, no son; Manuel Vecino, no grafismo; Solange Aumetre, na maquillaxe; e Xoán Ramón Sardiña, na produción. Eu fixera o guion e encargueime da dirección.

O proxecto ilusionábamos a todos, pero eramos conscientes de que non sería tarefa doada porque só dispuñamos de 18 millóns de ptas., mentres vascos e cataláns tiñan 180 e 200 para facer os seus. Nunca as comparacións serían máis odiosas.

Foi entón cando se me ocorreu a idea de que o curso fose impartido por un grupo de marionetas, deseñadas por min e realizadas por Taller Tragamasa; que collían vida nun fallado deseñado por Chelo Loureiro, quen, anos despois chegaría a ser importante produtora de cine de animación.

E así o fixemos. E sucedeu o incrible: cando os cursos de galego, eúscaro e catalán se pasaron na 2 de TVE, o preferido dos espectadores foi o noso. Por orixinal, claro; porque os outros eran moito mellores.

Estou a recordar aquel traballo porque acabo de encontrar en internet varias referencias ao curso de galego ¿Imos aló? E en todas aparece como director do mesmo o xornalista Lois Álvarez Pousa. O erro partiu da propia TVG, que, malia ter ao seu dispor os títulos de créditos nos que se le clarísimamente “guion e dirección: SIRO LÓPEZ”, por algunha estraña razón, fixo a Pousa director do curso. É un erro que outros copiaron ata se converter nunha cadea de erros. Pedín á TVG que corrixise a súa páxina e fixérono de contado. O erro matriz desapareceu; agora farei cando poida por deixar claro que o director de ¿Imos aló? fun eu. O curso non será gran cousa, pero, sentimentalmente, para min é importante.

Por certo, nos créditos figura Lois Álvarez Pousa como “Coordenador Produción”, porque naquel momento era o responsable de Vídeo Voz TV; pero  en ¿Imos aló? só se encargou de contratar os actores.

 

¿Te gustó este artículo? Compártelo

Share on facebook
Facebook
Share on twitter
Twitter
Share on pinterest
Pinterest
Share on linkedin
LinkedIn
Share on email
Email

1 comentario en “¿Imos aló? Curso de iniciación al idioma galego”

Deixa un comentario

Este sitio emprega Akismet para reducir o spam. Aprende como se procesan os datos dos teus comentarios.