Sobre Siro periodista

Cheguei ao xornalismo no ano 1970, apadriñado por Raimundo García Borobó, que dirixía en Madrid a revista Chan. Borobó presentoume en Chan como humorista gráfico, e desde entón non deixei de exercer como debuxante humorista e caricaturista en distintas publicacións galegas, ata chegar á redacción de La Voz de Galicia, onde me xubilei no 2006.

No decorrer de tantos anos, no xornalismo fixen de todo: humor gráfico, caricatura política, caricatura persoal, artigo de opinión, entrevista, reportaxe, crítica de arte… Pero en 1970 empecei a facer tamén xornalismo radiofónico. Con guións para uns espazos e como director doutros, fixen xornalismo para a TVG, nos anos oitenta e noventa.

Síntome afortunado por ter vivido desde dentro a época dourada do xornalismo en España, un xornalismo que, lamentablemente, ten pouco que ver co actual.         

Radio

Cheguei á radio no ano 1970, como guionista do programa cultural O espello, que na cadea COPE facía en Ferrol a locutora Xulia Díaz Sixto. Empecei escribindo diálogos humorísticos, despois entrevistas a escritores e artistas galegos, e cabo dalgúns anos fun o realizador e presentador do mesmo, ata o 1985.

Radio Nacional de España na Coruña contratoume no ano 1983 para facer unha serie de programas nos que analizaba as peculiaridades do humor popular galego e a súa repercusión na obra dos nosos escritores. Aquel espazo titulado O humor en Galicia, de emisión semanal, mantívose en antena durante ano e medio.

No 1985 dirixín en Antena 3 Galicia o curso radiofónico Galego coloquial, en colaboración co Instituto da Lingua Galega.

Desde ese mesmo ano presentei e dirixín distintos programas culturais e humorísticos en Radio Voz Galicia. O máis coñecido é o espazo humorístico Corre Carmela que chove, que se emite semanalmente desde 1990 e que no 1994 obtivo os premios Galicia de Comunicación, da Xunta de Galicia, e a Curuxa do Humor, do Museo do Humor de Fene. Desde o ano 2006 son só o guionista do programa.

Televisión e cine

Os meus primeiros traballos en TV foron como guionista e narrador de programas de difusión cultural, como as series Mosteiros e Lendas, realizadas nos anos 1986 e 1987 para a productora Voz TV.

No 1989 escribín os guións e deseñei as marionertas do curso de galego ¿Imos aló?, que emitiu a TVG ese mesmo ano. Foron 50 leccións, que tiveron continuidade nuha segunda parte, con actores, no 1990. Neste mesmo ano realicei os monográficos Castelao humorista literario e Castelao humorista gráfico, para a TVG.

A comezos dos anos noventa dirixín a serie Riscos, na que entrevistei a medio cento de artistas plásticos galegos, que en vinte minutos falaban da súa vida e da súa obra.

Durante o ano 2010 levamos o programa Corre Carmela que chove a VTv.

No ano 2008 fixen a versión galega da película A crise carnívora.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies