Juan Carlos Alonso, o mellor caricaturista que vin na miña vida

Rubén Darío por Juan Carlos Alonso
Rubén Darío por Juan Carlos Alonso

Juan Carlos Alonso Pita naceu en Ferrol o 6 de xullo de 1886, e aquí viviu ata a morte do pai, contramestre da Armada, cando decidiu emigrar á Arxentina, probablemente con quince anos. Tiña dezaseis cando entrou de recadeiro na revista Caras y Caretas, dirixida artísticamente polo galego José María Cao, quen descubriu o seu talento de debuxante e pasouno de recadeiro a viñetista.

En poucos meses Alonso fixo espléndidos debuxos nunha revista con vinte mil exemplares de tirada, traballando a carón dalgúns dos máis prestixiosos debuxantes naquel país, no que tantos había. Ademais de humorista gráfico e caricaturista, en pouco tempo converteuse en excelente ilustrador e cartelista.

As colaboracións en publicacións como Crítica, El Diario, Ultima Hora, e La Razón; a responsabilidade da dirección das revistas Caras y Caretas, que asumiría no 1919, e Plus Ultra, da que foi fundador, converteron a Juan Carlos Alonso no debuxante máis valorado e prestixioso de Sudamérica. En España a crítica repite os mesmos eloxios, e José Francés, organizador dos Salóns de Humoristas, recoñece nel un artista orixinal, extraordinariamente dotado e cunha depuradísima técnica persoal.

Alonso fixo, ademais, numerosas exposicións de pintura, que a crítica acolleu con entusiasmo. Participou no Salón de Artistas Arxentinos en París, no ano 1923 e no 1924 obtivo o Premio Cruz de Alfonso XII na Exposición Nacional de Bellas Artes, celebrada en Madrid. O Goberno español concedeulle a Encomienda de Caballero de la Orden de Alfonso XII, e a Real Academia Galega nomeouno corresponsal na Arxentina.

Morreu o 15 de febreiro de 1945 sen volver a Galicia, e lamentouno. Nunha entrevista recoñecía: Yo he salido de Galicia para volver a Galicia. Desde el momento en que abandoné nuestra tierra, ya su llamada no me dejó vivir en paz.

Na presentación da mostra antolóxica que inauguramos o 1 de xullo dentro da celebración da II Festa da Caricatura Cidade de Ferrol e na conferencia que sobre el e a súa obra din na Galería Sargadelos, tentei salientar as excepcionais cualidades deste artista ferrolán que, na miña opinión, acadou unha calidade como caricaturista que non foi igualada por ninguén.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies