Xosé Fortes Bouzán no Clube de Prensa de Ferrol

clube prensa de ferrol
clube prensa de ferrol
Siro, Xosé Fortes Bouzán, Miguel Fernández y Fernández

O Clube de Prensa de Ferrol organizou o pasado venres, día 14, unha conferencia de Xosé Fortes Bouzán que tratou o tema “A Unión Militar Democrática e os medios de comunicación”. Xosé Fortes Bouzán, é un dos once dirixentes da UMD detidos a finais de xullo de 1975, que serían condenados a durísimas penas en consello de guerra, en 1976, por “conspiración para a rebelión”. Non houbo tal conspiración, porque o único que os membros da UMD pretendían era que o Exército non interviñese en política. Fortes explicárao cunha frase que recolleran os medios de comunicación da época: “O Exército era o maior atranco para a transición á democracia, e o noso obxectivo era mollarlle a pólvora”.

O salón da Galería Sargadelos de Ferrol encheuse de xente que, por idade, recordaba e valoraba a valentía e a ética daqueles mandos militares que, por conviccións democráticas, se expuxeran a perder as súas carreiras profesionais, e perdéranas.

Pero esta conferencia organizada polo Clube de Prensa de Ferrol supuxo un caso insólito nas moitas que se teñen feito en toda España sobre a UMD, porque na mesa estaba o almirante Miguel Fernández y Fernández, que fixo unha introdución ao tema da conferencia, explicando como eran as Forzas Armadas nos anos en que naceu a UMD.

Miguel Fernández, naceu en Vigo, no ano 1940. É almirante da Armada en situación de retiro dende o 2005. Está en posesión do Diploma de Guerra Naval e do de “Mastar en Management” pola NPGS de Monterrey, California (EE.UU). Foi Agregado Naval ñas Enbaixadas de Bonn e Washington (EE.UU). Como Almirante foi Xefe do Estado mayor e Xefe do Arsenal Militar, en Ferrol; e estivo ao servizo da OTAN en Norfolk (EE.UU), Oeiras (Portugal) e Bruxelas (Bélxica). Foille concedida a Medalla dos Servizos Distinguidos da OTAN.

Na miña condición de presidente do Clube de Prensa de Ferrol acompañeinos na mesa e presenteinos de forma breve:

“(…) o Clube de Prensa de Ferrol organiza hoxe un acto que a min, personalmente, me resulta especialmente emotivo: unha conferencia de Xosé Fortes Bouzán sobre a UMD e os medios de comunicación. Coido que esta conferencia será para todos nós unha viaxe nostálxica a un tempo de idealismo, pero estou certo de que será moitas cousas máis.

Vedes que me acompañan na mesa Xosé Fortes e Miguel Fernández. Vounos presentar ao alimón, porque hai neles coincidencias que me moven a facelo. Os dous son militares; de Mariña, Miguel Fernández; de Infantería, Xosé Fortes. Os dous son homes da cultura: pintor, poeta e narrador de contos para nenos, Miguel Fernández; historiador con excelentes traballos publicados, Xosé Fortes; e os dous son homes entrañabeis. Fortes, o meu amigo Pepe Fortes, é unha das persoas máis cordiais que coñecín na miña vida; Miguel, a quen empecei a tratar recentemente, é un home que gaña nas distancias cortas e que me sorprende gratamente cada día. Por último, os dous fan extraordinariamente ben todo o que se propoñen e todo o que lles propoñen. A Xosé Fortes propuxémoslle unha conferencia sobre “A UMD e os medios de comunicación”, e a Miguel Fernández que faga unha introdución ao tema. Eu non sei que vai dicir, pero sei que o que diga estará ben dito.

Só me queda suliñar que o almirante Miguel Fernández fixo unha brillantísima carreira profesional, e a de Fortes caeu en picado cando só era capitán, aínda que, despois de rehabilitado chegou a coronel. Menos coñecido é o dato de que nunha película de José Luis Cuerda fixo o papel de xeneral, pero, por razóns técnicas esas imaxes desapareceron da película, e eu sentino moito porque me encantaría velo co uniforme de xeneral”.

O acto pechou cun coloquio no que interviron os dous oradores, e eu, polo avanzado da hora, vinme na necesidade de interrompelo cando máis animado estaba.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies