Carta aos futuros lectores de “Castelao en el arte europeo”

libro_castelao

Amigos, por fin rematei un dos dous libros que levei corenta anos na cabeza. Un libro sobre Castelao artista, pero con outro título para non coincidir co de Luís Seoane. Un libro de debuxante a debuxante, á altura do panel; ollando de moi preto, mesmo dende a propia experiencia, o seu traballo artístico. Titúlase Castelao en el arte europeo, así, en castelán, en tradución do filólogo Alejandro Rodríguez Gómez, porque a Castelao hai que dalo a coñecer fóra de Galicia. Sae cun prólogo de Valeriano Bozal e unha presentación de María Victoria Carballo-Calero, editado por Duen De Bux, que son uns virgueiros. Digo que son virgueiros porque, ademais de editar moi ben, fano a moi bo prezo. O libro, con 224 páxinas e 30 ilustracións, terá un prezo de 20 euros, pero na pre venta costa 16. Vede a información en  http://www.duendebux.com

¿Por que quería facer este libro? Porque para min Castelao foi un debuxante extraordinario, un mestre a quen estudar, e estudeino, en todas e cada unha das súas facetas: caricaturista, humorista gráfico e ilustrador, no senso máis amplo do termo. Aquí analizo a súa obra viñeta a viñeta, imaxe a imaxe, cando o caso o require.

Refírome ao Álbum Nós, aos Álbumes de guerra, aos Debuxos de negros, aos Debuxos de cegos. E digo o que penso, aínda que as miñas conclusións non sexan compartidas por outros estudosos. Considero que o eloxio esaxerado e a crítica inxusta son igualmente negativos, e Castelao recibiu uns e outras. Este é un libro á marxe de sectarismos e de beaterías, que o noso artista non necesita, porque nada importa que algúns debuxos non me parezan afortunados; Castelao é, co conxunto da súa obra baixo o brazo, un dos grandes humoristas gráficos europeos; e, malia a gravísima cegueira que padecía cando elaborou os álbumes de guerra, un dos mellores ilustradores de calquera confrontación bélica.

O libro é denso –ameno, pero denso-, xa dixen que ten moitas páxinas porque para tratar do humor gráfico precisei teorizar, unha vez máis, sobre as formas do humor literario; pero como estamos en confianza, suxírovos aos que me fagades a honra de lerme, un estraño percorrido polas súas páxinas. Empezade pola parte que analiza a obra gráfica: Introdución, Diario 1921 e drama íntimo, e Capítulos IV a IX. É a máis orixinal, a que aporta información descoñecida e sorprendente. Despois volvede atrás e metédelle o dente ás reflexións que fago sobre o Castelao escritor, porque, Castelao –ninguén teña dúbidas- é tamén un dos grandes humoristas da literatura universal. E o máis cervantino -¿ou debo dicir “cervantista”?- de todos.

Por certo, o outro libro que levei corenta anos na cabeza titúlase Cervantes, o Quixote e a invención do humorismo, e confío en velo editado no 2016.

Grazas e que gocedes léndoo tanto coma min escribíndoo.

Siro

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies