“Cervantes e o Quixote. A invención do humorismo” presentación en Madrid

O día 26 de abril, ás 19,30 h, presentabamos na Casa de Galicia en Madrid o meu último libro “Cervantes e o Quixote. A invención do humorismo”. Se digo que me sentín moi honrado de que o presentador fose Darío Villanueva, director da Real Academia Española, non estou a corresponder con cortesía á súa cortesía, senón a manifestar un sentimento sincero.

Como todos os que o coñecemos, admiro a este home intelixente, culto, cordial e bo. Si, digo ben. Se Darío Villanueva é admirable pola traxectoria profesional, non o é menos pola súa bonhomía. Ser de condición humilde, xeneroso e amable axuda a facerse querer; ser, ademais, responsable nas obrigas, axuda a facerse respectar. Darío Villanueva é todo iso, de aí que sexa querido e respectado no mesmo grao e que eu me sentise tan honrado como agradecido de que adicase moitas horas a ler atentísimamente o meu libro para comentalo ante o público que asistiu ao acto celebrado no precioso palacete da Casa de Galicia.

A intervención de Darío foi longa, case –ou sen case- unha conferencia, unha espléndida conferencia; pero por min podería alongala máis porque en cada tema que expuña advertía que xa estaba tratado por min no meu libro e con acerto. O auditorio valorou a intervención e premiouna cunha ovación enorme.

En nome da Consellería de Educación asistiu e participou no acto Manuel González, membro da Real Academia Galega e director do Centro Ramón Piñeiro, editor do libro. Manolo recordou a miña vella relación co Centro Ramón Piñeiro; que, hai moitos anos, decorei as súas paredes coas caricaturas dos mellores amigos de Piñeiro e que, o ano que se adicou o Día das Letras Galegas a Ramón Piñeiro, aportei unha gran exposición de retratos, caricaturas e visións do homenaxeado. Ao Secretario Xeral de Cultura, Anxo Lourenzo, e a Manuel González debo a edición deste ensaio. Os dous confiaron en min cando lles falei da conveniencia de participar na celebración do IV Centenario da edición da Segunda Parte do Quixote e do pasamento de Cervantes cun ensaio que explicase por que e como Cervantes creou no Quixote unha nova forma de humor, a máis trancendente: “o humorismo”.

E iso mesmo tentei explicalo, en poucos minutos, a un auditorio atentísimo. Recordei as aportacións de Wenceslao Fernández Flórez, Julio Casares, Pío Baroja, Ramón Gómez de la Serna, Pirandello e Celestino Fernández de la Vega aos estudos do humor, concretamente do humorismo, en Cervantes; e o que o meu libro aporta como novidade ao exposto por eles. Arriscándome a semellar pretencioso e pedante, afirmei que o meu ensaio non é “un corta e pega” porque as tres cuartas partes do mesmo son aportacións orixinais, froito do estudo, a investigación e o exercicio do humor gráfico e literario durante cincuenta anos. Por iso, aínda que, neste intre, nada me gustaría tanto como ver editado o libro en castelán, faime feliz que este traballo, o máis profundo e ambiciosos de cantos existen sobre o humor de Cervantes, nacese en galego.

Venme á memoria, como se estivese a ver un vídeo, o acto de ingreso de Marino Dónega na Academia Galega cun discurso sobre a novela “Os dous de sempre”, de Castelao, e a resposta de Ramón Piñeiro. Cando un aplauso estrondoso premiaba ambas intervencións, achegóuseme Celestino Fernández de la Vega e preguntoume: –Oe, ¿cantos actos deste nivel cres que se celebrarán na Real Academia Española?

Respondinlle que poucos e agora penso que poucos actos deste nivel protagonizarei no que me queda de vida.

A anécdota

Bieito Rubido, director do ABC, é un vello amigo e como amigo se portou ao cubrir a información deste acto. O ABC sacoume na páxina 4 entre “os personaxes do día” e nas páxinas da edición de Madrid adicoume unha páxina enteira. Merquei o xornal, naturalmente; e cando me puxen a facer o crucigrama resultou que  na horizontal 7 había que poñer un nome de varón, que resultou ser “SIRO”. Incrible, pero certo. Escribinlle a Bieito dándolle as grazas pero díxenlle que se excederá co do crucigrama. Aínda debe de estar rindo hoxe.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies