Puntadas sen fío: Colón, símbolo de odio

En New York queren quitar o monumento a Colón, erixido para conmemorar os 400 anos do Descubrimento. Unha concelleira de orixe portorriqueña, Melissa Mark-Viverito, di que Colón “llevó opresión a los nativos que poblaban el Caribe”, polo que o monumento pode ser un “símbolo de odio”.

Tamén en Barcelona, no 2016, os concelleiros da CUP levaron a un pleno a proposta de retirar o monumento a Colón e poñer no seu lugar un símbolo da resistencia americana “contra o imperialismo, a opresión e a segregación indíxena e afroamericana”.

Desde rapaz, Cristóbal Colón foi un dos meus heroes favoritos. Con sete anos debuxaba na pizarra as carabelas navegando, unha detrás de outra, cara o horizonte e con nove pasmaba vendo nun libro da Biblioteca Municipal de Ferrol as reproducións dos lenzos que representaban o momento supremo do Descubrimento. Gustábame, sobre todo, o do pintor romántico Teófilo Dióscuro Puebla, no que Colón co cabelo branco, xeonllo en terra, o estandarte nunha man e a espada rendida na outra, ergue os ollos ao Ceo. Coma el, soldados e mariñeiros de aspecto nobre e pulcrísimos, como recén saídos da ducha, parecen orar en silenzo, mentres un monxe franciscano adianta o brazo co crucifixo, anunciando a misión evanxelizadora de España. Os indios, espidos, óllanos como a deuses.

Moi novo, souben que na misión civilizadora de España en América houbo tanta crueldade e expolio, que o Papa Paulo III tivo que publicar a bula Unigenitus Deus,  na que alude aos encomendeiros e conquistadores que, por cubiza, afirman que os indios non son humanos e redúcenos á escravitude “con tantas aflicións como as que usan coas bestas”. Endebén, a figura de Colón parecía libre de culpa e cando coñecín a información sobre a súa posible galeguidade, intereseime, convencinme e, ao sabelo galego, sentín certa fachenda. ¡Home, algo “caco” era, que na primeira viaxe prometera 10.000 maravedís a quen avistase terra e cando Rodrigo de Triana o fixo, non lle pagou porque dixo que el a vira primeiro!

Pero no ano 2006 a historiadora Consuelo Varela deu a coñecer un documento aparecido no arquivo de Simancas, que recolle a investigación do comendador Francisco de Bobadilla sobre a xestión de Colón como Virrei e Gobernador das Indias. Colón aparece como un tirano, un ser ruin, avarento e cruel, que só vía nos indios unha fonte de ingresos a través do seu traballo ou da venta como escravos. Perdeuno a cubiza e volveu a España cargado de cadeas.

Eduardo Galeano, o escritor uruguaio listo como un allo, xa notara que “en su diario, Colón escribió 139 veces la palabra oro y 51 la palabra Dios o Nuestro Señor”.

2 comentarios en “Puntadas sen fío: Colón, símbolo de odio

  1. Hombre Colon no era un religioso precisamente si no un ser mundano con obligaciones por las que rendir cuentas y por ello es mas razonable hable de oro (dinero) que de temas Teológicos.
    Y yo creo que si, lo que hay es un animo no por defenestrar a Colon sino a España en todos los ambitos y aqui ya sabemos la izquierda es apatrida por naturaleza y la española ademas por aficion.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies