Alonso Montero presidente da Real Academia Galega

Xesús Alonso Montero
Xesús Alonso Montero

Xesús Alonso Montero e Manolo González competiron pola presidencia da Real Academia Galega. Os dous son amigos meus, e aos dous felicitaría con idéntica cordialidade, fose quen fose o gañador.

Á sensibilidade e á intelixencia de Manolo González, director do Centro Ramón Piñeiro, débolle a posibilidade de realizar unha exposición sobre a figura de Ramón Piñeiro, no ano 2009, cando a Academia lle adicou o Día das Letras Galegas; a mostra máis sentida de cantas fixen na miña vida.

Á Xesús, amigo de vello, débolle eso: unha amizade leal e xenerosa desde o mesmo momento en que nos coñecemos, unha tarde, en Ferrol, na librería Helios. Empezaba eu a exercer de humorista gráfico na revista Chan, cunha serie de debuxos que Borobó, o director, titulou “Os nenos de Siro”. Aquel día Xesús ofreceume a posibilidade de recoller as miñas viñetas nun libro, que el prologaría. A idea non foi adiante porque non me atrevín, porque me deu medo convertirme en autor. Pero Xesús seguiu de perto a miña traxectoria e contou comigo na celebración de actos inesquecibeis. Foi el quen me levou a falar de Castelao á Universidade de Braga; e de Luis Seoane á de Guimaraes; e foi el que me invitou a participar nun seminario sobre García Lorca na de Compostela… Eu, caricaturista profesional, desexaba corresponder a tantas mostras de afecto cunha excelente caricatura, pero non había maneira. Fíxenlle varias, pero ningunha boa. Ata que un día, pechei os ollos e vino. Non sei se abrín os ollos para debuxalo ou se o fixen a cegas, pero no papel apareceu “a vera efixie” do meu Xesús Alonso Montero. O deseño, é de hai dez ou doce anos; pero vale para o día de hoxe, porque, aínda que el o nega, Xesús fixo daquela un pacto co demo.

Deixa un comentario

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies